اسلام آباد۔4جولائی(اے پی پی) پاکستان اڄوکے سال اکتوبر اچ شنگھائی تعاون تنظیم (ایس سی او)دے سربراہان حکومت دے اجلاس دی میزبانی کریسی ، اکتوبر اچ تھیوݨ آلے سربراہی اجلاس توں پہلے ھک وزارتی اجلاس اتے اعلیٰ حکام دی میٹنگز دے کئی دور تھیسن جیں اچ ایس سی او دے رکن ملکاں وچال مالی، اقتصادی، سماجی، ثقافتی تے انسانی تعاون تے توجہ ݙتی ویسی ۔ اے ڳالھ دفتر خارجہ دی ترجمان ممتاز زہرہ بلوچ پریس بریفنگ اچ آکھی اے ۔ انہاں آکھیے 2024 پاکستان اتے ایس سی او تعلقات سانڳے ھک اہم سنگ میل اے کیوں جو پاکستان کنے ایس سی او کونسل آف ہیڈز آف گورنمنٹ (سی ایچ جی) دی گردشی چیئرمین شپ اے، جیڑھی جو ایس سی او دا ݙوجھا اعلیٰ ترین فیصلہ ساز فورم اے۔ ایں حیثیت اچ پاکستان اڄوکے سال اکتوبر اچ شنگھائی تعاون تنظیم دے سربراہان حکومت دے اجلاس دی میزبانی کریسی ۔ ترجمان آکھیے وزیر اعظم محمد شہباز شریف اڄ ایس سی او پلس سمٹ توں خطاب کریسن ، وزیر اعظم اہم علاقائی تے عالمی مسئلیں تے پاکستان دے نقطہ نظر دا اشتراک کریسن ۔ انہاں آکھیے وزیر اعظم محمد شہباز شریف آستانہ اچ شنگھائی تعاون تنظیم دے کونسل آف ہیڈز آف سٹیٹ اتے ایس سی او پلس دے ݙو سربراہی اجلاساں اچ شرکت سانڳے قازقستان وچ ہن ، نائب وزیر اعظم اتے وزیر خارجہ محمد اسحاق ڈار اتے کابینہ دے ٻئے سینئر ارکان اتے اعلیٰ سرکاری افسر وی انہاں دے رلے ہن ترجمان آکھیے جو شنگھائی تعاون تنظیم دے سربراہان دی کونسل دے اجلاس اچ وزیر اعظم اہم علاقائی اتے عالمی مسئلیں تے پاکستان دا موقف ݙسیسن تے ایندی اہمیت کوں اڳونہاں کریسن پاکستان شنگھائی تعاون تنظیم دے رکن ملکاں نال علاقائی رابتے تے تعاون کوں اہمیت ݙیندے۔ ترجمان آکھیے وزیراعظم محمد شہباز شریف گزریل ݙینھ آذربائیجان دے صدر الہام حیدر علیوف اتے ترک صدر رجب طیب ایردوان دے رلے آستانہ اچ شنگھائی تعاون تنظیم دے سربراہی اجلاس ویلھے پاکستان۔ آذربائیجان ۔ترکی سہ فریقی سربراہی اجلاس اچ شرکت کیتی ترائی رہنماواں تجارت، توانائی، سیاحت، ثقافت، تعلیم، ٹیکنالوجی، صحت دی ݙیکھ بھال تے ماحولیاتی تعاون جیہے شعبیں تے توجہ ݙیندے سہ فریقی تعاون ودھاوݨ تے اتفاق کیتے ۔ انہاں آکھیے اے سربراہی اجلاس وزرائے خارجہ، پارلیمنٹ دے سپیکراں اتے دفاعی حکام دی سطح تے سہ فریقی مشاورت دے بعد تھیندے۔
