خیرپور۔21دسمبر(اے پی پی)وزیراعظم محمد شہباز شریف آکھیے جو وفاقی حکومت سندھ دے سیلاب متاثرہ لوکاں کوں کلہا نا چھڑیسی، متاثرین کوں سوکھ ݙیوݨ کتیے اقدامات جاری رہسن، سیلاب متاثرین کوں شفافیت نال عطیات ونݙیندے پن، بے گھراں کوں سر دی چھت وی ݙیسوں۔ اے ڳالھ انہاں سندھ اچ ضلع خیرپور دے سیلاب متاثرہ علاقیاں تعلقہ کوٹ ڈیجی اتے پیرگوٹھ دے دورے ویلھے متاثرین نال الیندے آکھی۔ انہاں نال وفاقی وزیر منصوبہ بندی و ترقی احسن اقبال، وفاقی وزیر اطلاعات و نشریات مریم اورنگزیب، وفاقی وزیر موسمیاتی تبدیلی شیری رحمان، نیشنل ڈیزاسٹر مینجمنٹ اتھارٹی دے چیئرمین لیفٹیننٹ جنرل انعام حیدر ملک اتے صوبائی حکومت دے اعلیٰ حکام وی موجود ہن۔ وزیر اعظم آکھیا جو سیلاب نال سندھ دے لوکاں کوں ٻہوں اوکھ ٻھوڳݨا پئے، وݙی تباہی آئی اے، حکومت متاثرین کوں سوکھ ݙیوݨ کیتے صوبائی حکومت کوں ودھ وسائل ݙتن، بینظیر انکم سپورٹ پروگرام ولوں متاثرین ک??ں 70 ارب روپے ونݙین، عوام دی خدمت ساݙی ترجیح اے، متاثرہ علاقیاں دی بحالی اتے تعمیر نو دا کم بہوں حد تئیں مکمل تھی چکیے ٻھل دادو دے کجح علاقے حالی وی متاثر ہین جتھو پاݨی تیکھے کݙھݨ دی لوڑھ اے۔ انہاں آکھیا جو سیلاب نال 90 لکھ ٻالاں سودھا 2 کروڑ لوکاں کوں امداد دی لوڑھ اے، خوراک و ادویات ݙیوݨ کیتے ارباں روپے دی لوڑھ پوسی۔ انہاں وزیراعظم فلڈ ریلیف فنڈ اچ 2 ارب 75 کروڑ روپے دے عطیات ݙیوݨ تے سمندر پار پاکستانیاں دی تعریف کریندے آکھیا جو حکومت متاثرین دی مناسب رہائش کیتے مکان ٻݨیسی۔ انہاں خیرپور اچ کامسیٹس یونیورسٹی دا کیمپس ٻݨاوݨ دا وی اعلان کیتا۔ او عارضی کیمپاں اچ موجود سیلاب متاثرین نال ملین اتے ہمدردی کریندے مکمل سرپرستی دا یقین ݙیوایا۔ ۔ انہاں متاثرہ علاقیاں دا فضائی جائزہ وی ڳھدا۔ ایں موقع تے چیئرمین این ڈی ایم اے لیفٹیننٹ جنرل انعام حیدر ملک بریفنگ ݙتی اتے سیلابی پاݨی کݙھݨ، بحالی دے کماں بارے ݙسایا۔ وزیراعظم متاثرہ علاقیاں توں پاݨی کݙھݨ اچ تیزی، اضافی مشینری، افرادی قوت اتے ودھ وسائل لاوݨ دی ہدایت کیتی جو ٹھݙ ودھݨ پاروں لوکاں کوں تیکھے محفوظ پناہ ڳاہ اتےس ر دی چھت ݙتی ونڄے۔ وزیراعظم سیلاب زدہ علاقیاں اچ امداد، بحالی و رسکیو کماں سانڳے این ڈی ایم اے اتے سارے متعلقہ اداریاں دے کردار دی تعریف کیتی۔
