لاہور۔26ستمبر (اے پی پی) اسپیکر قومی اسمبلی سردار ایاز صادق آکھیے جو وزیراعظم محمد شہباز شریف دی قیادت اچ ملک ترقی آلے پاسے ویندا پئے ، حرمین شریفین دی سکیورٹی دے حوالے نال پاک سعودی دفاعی معاہدہ پاکستان کیتے اعزاز توں گھٹ کائنی ، اڄوکی چھل اچ وزیراعلیٰ مریم نواز متاثرین کوں ریلیف ݙیوݨ کیتے انتھک محنت کیتی۔ اے ڳالھ انہاں صوبائی وزیر سہیل شوکت بٹ دے نال مناواں اچ مختلف ترقیاتی منصوبیں دے افتتاح دے موقع تے تقریب نال خطاب کریندے آکھی۔اسپیکر قومی اسمبلی سردار ایاز صادق آکھیا جو پاکستان دی اے خوش قسمتی اے جیں کوں محمد نواز شریف اتے وزیراعظم محمد شہباز شریف جیھی ورکر دوست قیادت ملی، دنیا اچ ایں ویلھے پاکستان دی جیڑھی عزت اے او ایں کوں گزریل 75 سال اچ وی نی ملی، اڄ دنیا پاکستان کنے ݙیکھدی پئی اے اتے ایں دے نال سرمایہ کاری کرݨ چاہندی اے، وزیراعظم محمد شہباز شریف دی قیادت اچ موجودہ حکومت پاکستان کوں ڈیفالٹ تھیوݨ توں بچایا، ملک کوں بحراناں توں کڈھیا جیں دی وجہ نال اڄ پاکستان دی معیشت مستحکم تھی چُکی اے، مہانگ دا گراف تلے آئے، سٹاک مارکیٹ اُتے تھئن ، غریب بندہ خوشحالی دی زندگی گزریندا پئے۔انہاں آکھیا جو معرکہ حق اچ پاکستان آپݨے توں کئی گنا وݙے دشمن کوں شکست ݙے تے اے ثابت کر ݙتا جو افواج پاکستان بہادر اتے دنیا دی باصلاحیت فوج اے، پاکستان ہک امن پسند ملک اے اتے ایں ہمیشہ خطے اچ امن دا پرچار کیتے لیکن جے پاکستان تے کوئی دشمن بُری نظر پیسی تاں اساݙی قیادت اتے سپہ سالار کوں ایں دا جواب ݙیوݨ آندے، بھارت کوں آپݨی طاقت تے زعم ہئی اتے ایں زعم کوں اساݙی سیاسی اتے عسکری قیادت آپݨی بہترین حکمت عملی نال بھن ݙتے۔اسپیکر قومی اسمبلی آکھیا جو سعودی عرب دے لوکاں توں پُچھو جو پاکستان دی اتھاں کتنی عزت اے، اساں خوش قسمت ہیسے جو اساکوں سعودی عرب اچ حرمین شریفین دی سکیورٹی دی ذمے واری ملی اے، جتھاں ونڄݨ کیتے لوک ترسدن، پاکستان اتے سعودی عرب وچال دفاعی معاہدہ تھئے او پاکستان کیتے ہک اعزاز توں گھٹ کائنی ۔ انہاں آکھیا جو پاک سعودی معاہدے دے تلے اے تصور کیتا ویسی جے سعودی عرب تے کوئی حملہ کریندے تاں او پاکستان تے حملہ ہوسی اتے سعودی عرب آکھیا جو جے پاکستان تے حملہ تھیا تاں او سعودی عرب تے تصور کیتا ویسی۔انہاں آکھیا جو دنیا اچ ݙو ملکاں دے علاوہ باقی سارے پاکستان دے نال تعلقات بݨاوݨ چاہندن، اساں بھارت کوں وی آکھدوں جو آؤ خطے اچ امن قائم کرݨ کیتے ہک میز تے ٻہہ تے مذاکرات کروں۔ سردار ایاز صادق آکھیا جو وزیراعظم محمد شہباز شریف پاکستان دی خوشحالی کیتے ݙینھ رات محنت کریندے پئن، او امریکہ، سعودی عرب و ٻئے ملکاں اچ پاکستان دا ناں روشن کریندے پئن، پاکستان اچ اتنی کشش اے جو سارے پاکستان آوݨ چاہندن۔انہاں وزیر اعلیٰ مریم نواز کوں خراج تحسین پیش کریندے آکھیا جو اڄوکی چھل ویلھے متاثرین کوں ریلیف ݙیوݨ کیتے ہر جاہ تے پڄن ، گھنٹے دھپ اتے پاݨی اچ گزاریے، چھل متاثرین کوں روٹی ٹکر پڄایا کہیں کوں بُکھا اتے چھت دے بغیر نی رہݨ ݙتا۔ انہاں آکھیا جو پورے پنجاب اچ ترقیاتی کم جاری ہن، ڳلیاں اتے سڑکاں بݨدیاں پئن، پنجاب اتے وفاق اچ پاکستانی عوام کنے ایجھی لیڈر شپ اے جو عوام دی خدمت تے یقین رکھیندی اے، ملک کیتے چنڳی ڳالھ اے جو پنجاب حکومت کہیں توں وی قرضہ ڳھدے بغیر سارے کم کریندی پئی اے۔انہاں آکھیا جو مخالفین پاکستان کوں ترقی کریندا نی ݙیکھ سڳدے، انہاں ہمیشہ انتشار دی سیاست کوں فروغ ݙتے،اڄوکی چھل اچ گھرئے لوکاں کیتے ایں جماعت کوئی کم نی کیتا بلکہ چھل متاثرین کوں ریلیف کیتے موجودہ حکومت دی کارکردگی تے نکتہ چینی کیتی۔ صوبائی وزیر سہیل شوکت بٹ تقریب نال خطاب کریندے ہوئیں آکھیا جو وزیراعلیٰ مریم نواز صوبے دی ترقی کیتے انتھک محنت کریندی پئی اے۔
