اسلام آباد۔16ستمبر (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال آکھیا جو سیلاب دے نقصانات دا تخمینہ صوبائی حکومتاں دے نال رل تے تیار کیتا ویسی، ݙاہ ݙینھ اچ سیلابی نقصانات دا ابتدائی تخمینہ مکمل کیتا ویسی، میڈیا سیلاب توں تھیوݨ آلے نقصانات تے قیاس آرائیاں توں باز رہے، صحیح اعداد و شمار جلدی سامھے آ ویسن۔ انہاں اے ڳالھ منگل کوں سیلاب دے نقصانات دا اندازہ لاوݨ کیتے کمیٹی دے اجلاس دی صدارت کریندیں ہوئیں آکھی۔ اجلاس اچ 2025 دے سیلاب توں نقصانات دے تخمینے دا جائزہ ڳیا۔ اجلاس اچ وفاقی وزیر خزانہ محمد اورنگزیب، چیئرمین این ڈی ایم اے، سیکرٹری وزارت موسمیاتی تبدیلی اتے صوبائی حکومتاں دے چیف سیکرٹریز شرکت کیتی۔ صوبائی حکومتاں ولوں اجلاس اچ ݙسایا ڳیا جو سیلابی نقصانات دا حتمی تخمینہ پاݨی لہݨ دے بعد ممکن ہوسی۔ وفاقی وزیر احسن اقبال آکھیا جو سیلاب دے نقصانات دا تخمینہ صوبائی حکومتاں دے نال رل تے تیار کیتا ویسی، ݙاہ ݙینھ اچ سیلابی نقصانات دا ابتدائی تخمینہ مکمل کیتا ویسی، میڈیا سیلابی نقصانات تے قیاس آرائیاں توں باز رہے، صحیح اعداد و شمار جلدی سامھے آ ویسن۔ انہاں آکھیا جو سیلاب توں متاثرہ علاقیاں اچ بحالی دا کم جاری اے، وفاقی اتے صوبائی ادارے رل تے سیلاب زدہ علاقیاں اچ امدادی کارروائیاں کریندے پئن، ایں واری وی 2022 دے طرز تے قدرتی آفات دے بعد نقصانات اتے لوڑھ دا تخمینہ عالمی اداریاں کوں شامل کر تے لاتا ویسی۔ احسن اقبال آکھیا جو سیلاب توں متاثرہ علاقیاں اچ صحیح اتے شفاف اعداد و شمار دی بنیاد تے امدادی اقدامات کیتے ویسن۔ انہاں آکھیا جو موسمیاتی تبدیلی پاکستان کیتے وݙا چیلنج اے، سیلاب اتے خشک سالی موسمیاتی تبدیلی دے براہ راست اثر ہن۔ انہاں آکھیا جو بھارت ولوں قدرتی آفت اچ وی سیاست کیتی ڳئی، موسمیاتی تبدیلی نال پاکستان دے گلیشیئرز تیکھے پگھلدے پئن اتے ایں نال سیلاب دے خطرات ودھ ڳئن ۔ انہاں آکھیا جو موسمیاتی تبدیلی دے چیلنج نال نبڑݨ کیتے قومی منصوبے تے کم جاری اے۔
