اسلام آباد۔18اگست(اے پی پی)وفاقی وزیر اطلاعات و نشریات عطاء اللہ تارڑ آکھیے جو آفت زدہ لوکاں دی مدد اساݙا قومی فریضہ اے، وفاقی حکومت ایں قومی ذمے واری دے تحت اپݨاں کردار نٻھیندی پئی اے، وزیراعظم دی ہدایت تے این ڈی ایم اے صوبائی حکومتاں نال رابطے اچ اے، متاثرین کوں امدادی سامان ݙیوݨ اتے متاثرہ علاقیاں اچ ریسکیو سرگرمیاں جاری ہن۔ اسلام آباد اچ وزیراعظم دی اڳواݨی اچ سیلاب اتے امدادی سرگرمیاں بارے تھیوݨ آلے اجلاس دے بعد وفاقی وزیر موسمیاتی تبدیلی مصدق ملک اتے چیئرمین این ڈی ایم اے لیفٹیننٹ جنرل انعام حیدر دے کٹھے میڈیا کوں بریفنگ ݙیندے وفاقی وزیر اطلاعات آکھیے جو وزیراعظم دی زیر صدارت اجلاس اچ ساوݨ دیاں اڄوکیاں بارشاں اتے سیلابی صورتحال دے نال نال خیبر پختونخوا اتے گلگت بلتستان اچ امدادی سرگرمیاں دا جائزہ ڳھدا ڳئے۔ انہاں آکھیے جو وفاقی حکومت صوبائی حکومتاں دے نال رل تے کم کریندی پئی اے، ساوݨ توں پہلے نیشنل کمانڈ اینڈ کنٹرول سنٹر اچ کئی اجلاساں اچ سارے صوبائی حکومتاں دے نمائندے شریک تھیندے رہین، این ڈی ایم اے پیشگی آگاہی نظام دے ذریعے باقاعدگی نال ڈیٹا متعلقہ اتھارٹیز کوں ݙتے۔ انہاں آکھیے جو ہنگامی صورتحال نال نبڑݨ کیتے قومی سطح تے کوششاں کیتیاں ویندیاں پین، وزیراعظم دی ہدایت تے این ڈی ایم اے صوبائی حکومتاں نال رابطے اچ اے، امدادی سامان اتے ریلیف سرگرمیاں جاری ہن، پاک فوج اتے فلاحی ادارے متاثرہ علاقیاں اچ ردھے ہوئن، سیکرٹری مواصلات پہلے ہی جگلوٹ سکردو روڈ دی مرمت اتے بحالی کیتے گلگت بلتستان اچ موجود ہن تاں جو سکردو دا رابطہ گلگت نال ولا جوڑیا ونج سڳے جݙاں جو چیئرمین این ایچ اے مالاکنڈ ڈویژن اچ موجود ہن تانجو ساریاں سڑکاں دا رابطہ بحال کیتا ونج سڳے۔ انہاں آکھیے جو وفاقی حکومت وفاقی وزرا اتے ٻئے متعلقہ حکام کوں متاثرہ علاقیاں اچ موجود رہݨ دی ہدایت کیتی اے، این ڈی ایم اے دے ذریعے سڑکاں، پاݨی اتے بجلی دے نظام دی بحالی کوں یقینی بݨایا ویسی، امدادی سامان دی ترسیل دی وی نگرانی کیتی ویسی تانجو او تیکھے متاثرین تئیں پڄ سڳے، وزیراعظم واضح کیتی اے جو اے قومی فریضہ اے، ایںدے اچ وفاقی تے صوبائی حکومتاں دا کوئی وانڄھ کائنی، سارے ادارے ہک تھی تے متاثرین دی بحالی اتے انفراسٹرکچر دی مرمت تے کم کریندے پئن۔
