اسلام آباد۔ 18 ستمبر(اے پی پی)انسپکٹر جنرل پولیس اسلام آباد خصوصی اقدامات دی ڈائریکٹر عائشہ دی اڳواݨی اچ اسلام آباد ٹریفک پولیس نال انٹرن شپ کرݨ آلے طلباء و طالبات دے 15 رکنی فرینڈز آف پولیس وفد ایسوسی ایٹڈ پریس آف پاکستان (اے پی پی) دا دورہ کیتا جتھاں انہاں کوں اے پی پی دے آپریشنل امور، شعبیاں دی ورکنگ تے تفصیلی بریفنگ ݙتی ڳئی۔ ایں موقع تے مینیجنگ ڈائریکٹر ایسوسی ایٹڈ پریس آف پاکستان (اے پی پی) محمد عاصم کھچی وفد کوں اے پی پی دی افادیت، کردار اتے کارکردگی دا ݙسایا۔ ایں موقع تے اے پی پی دی ڈائریکٹر نیوز شمائلہ عدیل، ڈائریکٹر اے پی پی اردو عبدالحمید تبسم، پروڈکشن انچارج آئی ٹی پی ایف ایم جندق اسحاق، آئی ٹی پی ایجوکیشن ونگ توں انسپکٹر رانا اشتیاق تے پروڈیوسر آئی ٹی پی ایف ایم رابعہ حسن وی موجود ہن۔ ایں موقع تے الیندے ایم ڈی اے پی پی محمد عاصم کھچی آکھیا جو اے پی پی پاکستان دی کلہی نیوز ایجنسی اے جیڑھی مصدقہ اطلاعات پچاوݨ دا انتظام کریندی اے، اساں ڈس انفارمیشن اتے مِس انفارمیشن تے یقین نئیں رکھیندے، ساݙا ادارہ مستند معلومات ملکی اتے عالمی ذرائع ابلاغ تئیں ویلھے تے پچاوݨ اچ اپݨا کردار ادا کریندا پئے۔ انہاں آکھیا جو سارے اخبارات اڄ وی خبراں دا کریڈٹ اے پی پی کوں ݙیندن، اے پی پی نہ صرف اردو، انگلش، چائنیز، عربی، پشتو، سندھی، سرائیکی، بلوچی، براہوی زباناں دے علاوہ ویڈیو نیوز، فوٹو، ڈیٹا تے سوشل میڈیا سودھا 16 نیوز سروسز ݙیندی پئی اے۔ محمد عاصم کھچی ݙسایا جو پاکستان دے سارے وݙے شہراں اچ ساݙے 18 دفاتر ہن اتے ہر ضلع اچ ساݙا نمائندہ کم کریندا پئے۔ انہاں آکھیا جو اے پی پی کولو سٹیٹ آف دی آرٹ ڈیٹا سنٹر موجود اے، 50 دیساں دے سٹیٹ میڈیا نال ساݙے خبراں دے تبادلے دے معاہدے ہین۔ محمد عاصم کھچی ݙسایا جو معرکہ حق اچ اے پی پی دے کردار دا ہندوستان وی اعتراف کیتے۔
