اسلام آباد۔22ستمبر (اے پی پی) وفاقی وزیرِ برائے قومی صحت سید مصطفیٰ کمال آکھیے جو پورے ملک اچ صحت دی سہولتاں ݙیوݨ دے دائرہ کار کوں تکھے ودھایا ویسی اتے پاکستان دے نظام صحت کوں چنڳا بݨاوݨ کیتے سانجھے تعاون کوں ٻیا مؤثر اتے مضبوط بݨایا ویسی۔ ایں سوچ دا اظہار انہاں ورلڈ بینک دے اعلیٰ سطح دے وفد نال ملاقات اچ کیتا۔ ایں موقعے تے پاکستان دے نظام صحت کوں مضبوط بݨاوݨ کیتے جاری کوششاں اتے چیلنجز تے ڳالھ کیتی ڳئی۔ وفاقی وزیر صحت آکھیے جو نیشنل ہیلتھ سپورٹ پروگرام دے مؤثر نفاذ کوں یقینی بݨاوݨ کیتے ورلڈ بینک پروگرام دی مدت اچ ہک سال دی توسیع کرے ۔ ورلڈ بینک دی درخواست تے مصطفیٰ کمال انٹر منسٹریل ہیلتھ اینڈ پاپولیشن کونسل کوں فوری طور تے ولا فعال کرݨ دی ہدایت جاری کیتی ۔ بین الصوبائی وزارتی اجلاس ایں ہفتے سݙیا ویسی تاں جو پالیسی دی سطح تے رلے مشورے کوں یقینی بݨایا ونڄ سڳے۔انہاں آکھیے جو یونیورسل ہیلتھ کوریج بارے اجلاس وی ایں ہفتے سݙایا ویسی۔ گلوبل فنانسنگ فیسیلٹی دے تحت تریمتاں، نیاندریں اتے نینگراں دی صحت اتے غذائیت دے حوالے نال فوکل پرسن نامزد کیتا ویسی۔ ورلڈ بینک وفد آندے 2 توں 3 مہینیاں اچ ہک ڈونر کانفرنس کراوݨ دی تجویز وی پیش کیتی جئیں دا مقصد وفاقی وزیر دے آندے 2 توں 3 سال دے وژن کوں نمایاں کرݨ اے اتے پاکستان دے شعبہ صحت اچ سانجھیداری اتے سرمایہ کاری دے موقعے ڳولݨ اے۔ وفاقی وزیر صحت ایں تجویز دا خیر مقدم کریندیں ہوئیں ڈونر کانفرنس کراوݨ اچ وزارت ولوں پوری مدد دا یقین ݙوایا اتے آکھیے جو وزارت صحت اتے ورلڈ بینک وچال قریبی رابطے اتے معلومات دے تبادلے کوں ودھارا ݙتا ویسی۔
